دعَتْني وجيت للموعد وكنت مْن الفرح كالطير
وجيت من العصر طاير ....مع ان الموعد المغرب
وجتنــــي بس مدري ليه شعرت الجيّــه هذي غير
وهي تقرب من عيـــوني شعرت ان الممـــات اقرب
وقلت الله يهوّنهـــا عسى في جيّتــــك لي خيــر
انا من شفتــــك أقبلتي وانا خايـــــف ومستغرب
على كثر الحكي مدري كأنّه خانها التعبير
وقالت لي جُمل وأشيـــــاء لا تكتب ولا تعرب
هـــدت فجأه تطالعنــي وأنــا في حاجة التفسير
لجل نحكي بهدوء اكثر سألت الحلوه اش تشرب
فصاحـت بي انا احبــــك ولك في هالحشا تقدير
وتدري ان المثل فينــــــا وفي احساسنا يُضـرب
وكنت انت الوفي وانت البــري من تهمة التقصير
ولكـــــن ذي عوايدهم من ايــــــام وزمن يثرب
تكون البنت لابن العم ورغبات الكبار تصير
وتدري الاقربـــــون اولى .. مع انك للخفوق أقرب
وتــدري للقدر كلمــــه.. لعــــادات الأهل تأثير
لذا أرجــــــــوك تتركني وانا من واقعك باهــرب
شعرت بحكيها كنّه قصاص وامر بالتعزير
شعرت الدنيا ضاقت بي من المشرق ليا المغرب
مشت خلّــــــت وراها طفل ما يدرك وش التدبير
يحسب ان الغرام أشعار شاعـــــر واغنية مطرب
ضحكت وماقدرت اني ألاقي لضحكتي تبرير
من اللي بوقتنا مرّه ضحـــك من لــــدغة العقرب ؟؟؟
رفضت أستوعب اللي صار ولا استسلمت للتغيير
ثمان سنين اجي نفس المكـــــان بســـاعة المغرب
ورغم ان الثمان سنين جـــرح وكلّفتني كثير
أنا لليوم أجي وأدعي.. تجي يارب .. تجي يارب,,
